Það var hægara sagt en gert fyrir íslenska landsliðið að leggja það færeyska að velli í mikilvægum leik í undankeppni HM í dag. En það tókst samt sem áður.

Leikurinn fór einungis fram á vallarhelmingi Færeyinga eins og búist var við. Þetta átti að vera skyldusigur fyrir Ísland. Ísland var með yfirburði en liðið átti í vandræðum með að skapa sér álitleg færi. Fyrsta markið lét ekki sjá sig fyrr en á 38. mínútu þegar Gunnhildur Yrsa Jónsdóttir skallaði í netið eftir fyrirgjöf Hallberu.

Staðan var 1-0 í hálfleik en Ísland var staðráðið í að bæta við fleiri mörkum í seinni hálfleik.

Endaði sem þægilegur sigur
Strax í upphafi seinni hálfleiks kom annað markið og það gerði Rakel Hönnudóttir. Harpa Þorsteinsdóttir kom sér svo á blað eftir sendingu varamannsins Öglu Maríu Albertsdóttur sem skoraði fjórða markið. Fanndís Friðriksdóttir bætti við fimmta markinu í uppbótartímanum og þar við sat. Á endanum var sigurinn þægilegur.

Það ber að hrósa Færeyingum fyrir frammistöðu sína í dag, þær létu okkar stelpur hafa fyrir hlutunum en þrjú stig hafa bæst við í pokann. Ísland fer með sex stig úr þessu verkefni.

Ísland er í öðru sæti riðils síns, tveimur stigum á eftir Þýskalandi. Ísland á leik til góða á Þýskaland. Framundan í sumar og haust eru heimaleikir gegn Slóveníu, Þýskalandi og Tékklandi. Þessir leikir munu skera úr um það hvort Ísland fer á HM eða ekki en möguleikinn er klárlega til staðar og hefur sjaldan ef aldrei verið betri.

Fanndís Friðriksdóttir adds our fifth just before full time!

It ends 0-5 for Iceland. Good three points!#dottir pic.twitter.com/5vg1QBaUtW

— Knattspyrnusambandið (@footballiceland) April 10, 2018